اس پہ ایمان بھی ایقان بھی ہم رکھتے ہیں

اس پہ ایمان بھی ایقان بھی ہم رکھتے ہیں

غیب کا علم شہنشاہِ امم رکھتے ہیں

---

خوف رکھتے ہیں زمانے کا نہ غم رکھتے ہیں

دل میں عشقِ شہِ ابرار جو ہم رکھتے ہیں

---

بات ایسی کہ ہر اک بات میں دم رکھتے ہیں

ہم بس اقوالِ شہنشاہِ امم رکھتے ہیں

---

سر اٹھاتے نہیں طوفان ہمارے آگے

فیضِ عشقِ شہِ لولاک سے، خم رکھتے ہیں

---

اس طرح دل کو بناتے ہیں مدینہ ان کا

دل میں آقا کی تمناؤں کو ہم رکھتے ہیں

---

کر تے رہتے ہیں مگر جیسا کہ حق ہے اس کا

ہم سے ممکن نہیں توصیف، قلم رکھتے ہیں

---

یونہی آتے نہیں تبریک کے گلدستے شفیقؔ

ہم بھی اشعار میں خوشبوئے حرم رکھتے ہیں