نگارشوں کو شرف خاصۂ رسولؐ سے ہے

نگارشوں کو شرف خاصۂ رسولؐ سے ہے

کہ مدحتوں کو شرف خاصۂ رسولؐ سے ہے

---

دعائیں دیتے ہیں دشمن کو ہر ستم سہہ کر

مروّتوں کو شرف خاصۂ رسولؐ سے ہے

---

انھیؐ کے نام پہ سجتی ہیں محفلیں اپنی

کہ محفلوں کو شرف خاصۂ رسولؐ سے ہے

---

حضورؐ ہم کو حضوری کا اذن دیتے ہیں

حضوریوں کو شرف خاصۂ رسولؐ سے ہے

---

وگرنہ کون ہمیں پوچھتا قیامت میں

شفاعتوں کو شرف خاصۂ رسولؐ سے ہے

---

قدم حضورؐ جو رکھیں تو وہ بنے جنّت

کہ جنتّوں کو شرف خاصۂ رسولؐ سے ہے

---

جو لب سے آپؐ کے نکلا تو حکمِ رب ٹھہرا

بشارتوں کو شرف خاصۂ رسولؐ سے ہے

---

سب انبیا کے مصدّق رسولِؐ اکرم ہیں

’’نبوّتوں کو شرف خاصۂ رسولؐ سے ہے‘‘

---

بلالؓ و طلحہٰ و بوذرؓ کے مرتبے ہیں بلند

غلامیوں کو شرف خاصۂ رسولؐ سے ہے

---

ہے کامران جہانوں میں آپؐ کی امّت

یہ رحمتوں کو شرف خاصۂ رسولؐ سے ہے

---

یہ نسبتیں ہی نجابت کا روپ بھرتی ہیں

نجابتوں کو شرف خاصۂ رسولؐ سے ہے

---

ہیں زیرِ سایہ مساجد نبیؐ کی مسجد کے

یوں مسجدوں کو شرف خاصۂ رسولؐ سے ہے

---

ہے آلِ پاک مقدّم ترین عالم میں

یہ عترتوں کو شرف خاصۂ رسولؐ سے ہے

---

جو انؐ کے نام پہ مٹتے ہیں نام پاتے ہیں

شہادتوں کو شرف خاصۂ رسولؐ سے ہے

---

زمانہ سارا ازل سے ہے انؐ کا مدح سرا

سبھی دلوں کو شرف خاصۂ رسولؐ سے ہے

---

بتا دیا کہ حکومت دلوں پہ کرتے ہیں

خلافتوں کو شرف خاصۂ رسولؐ سے ہے

---

حقیقتوں کا خلاصہ حضورؐ ہیں طاہرؔ

حقیقتوں کو شرف خاصۂ رسولؐ سے ہے