غم طمانیت و تسکین میں ڈھل جاتے ہیں

غم طمانیت و تسکین میں ڈھل جاتے ہیں

جب کرم ہوتا ہے حالات بدل جاتے ہیں

---

اُن کی رحمت ہے خطا پوش گنہ گاروں کی

کھوٹے سِکے سر بازار بھی چل جاتے ہیں

---

اسمِ احمدؐ کا وظیفہ ہے ہر اک غم کا علاج

لاکھ خطرے ہوں اسی نام سے ٹل جاتے ہیں

---

آپؐ کے ذکر سے اک کیف ملا کرتا ہے

اُور جتنےبھی ہیں اسرار وہ کھل جاتے ہیں

---

اپنی آغوش میں لیتا ہے جب انکا کرم

زندگی کے سبھی انداز بدل جاتے ہیں

---

عشق کی آنچ سے دل کیوں نہ بنے گا کعبہ

عشق کی آنچ سے پتھر بھی پگھل جاتے ہیں

---

رکھ ہی لیتے ہی بھرم ان کے کرم کے صدقے

جب کسی بات پہ دیوانے مچل جاتے ہیں

---

دم نکل جائے تیری یاد میں پھر ہم بھی کہیں

للہ الحمد لئے حُسنِ عمل جاتے ہیں

---

آپڑے ہیں ترے قدموں میں یہ سن کر ہم بھی

جو ترے قدموں پہ گرتے ہیں سنبھل جاتے ہیں

---

امتِ احمدِ مختارؐ نہیں ہوسکتے

اور ہیں اور جہنم میں جو جل جاتے ہیں ،

---

مطئمن ہوں گے مگر دیکھ کے جلوہ ان کا

ہم نہیں وہ جو کھلونوں سے بہل جاتے ہیں

---

آپؐ کو کعبہِء مقصود ہی مانو خالدؔ

آپؐ کے در پہ سب ارمان نکل جاتے ہیں

---

یاد اُن کی بدَل اُن کا نہیں ہونے پاتی

ہجر کے شام وسحر پیار میں کُھل جاتےہیں