کر مرے تِشنہ ہنر پر بھی کرم یا اللہ
رفعتِ حمد کو چھولے یہ قلم یا اللہ
انتہا حمد کی الحمد سے کرنے والے
مبتدی کیسے کرے حمد رقم یا اللہ
میرے معبود معافی کی مسرت دے کر
دور فرما دے مرے رنج و الم یا اللہ
اپنے محبوب سے عصیاں مرے مخفی رکھنا
روبرو ان کے تو رہ جائے بھرم یا اللہ
مانتا ہوں کہ خطا میری ہے حد سے زائد
تیری رحمت سے بہ ہر کیف ہے کم یا اللہ
درگزر کر دے تو منعوت بہت خوش ہوں گے
ناعتِ سرورِ کونین ہیں ہم یا اللہ
خم ہے پیشانیٔ اشفاق تری چوکھٹ پر
کاش یہ دل بھی جھکے سوئے حرم یا اللہ
شاعر کا نام :- اشفاق احمد غوری
کتاب کا نام :- انگبین ِ ثنا