کوئی بھی ہمسر نہیں بندہ ترا
تو ہے خالق وصف ہے یکتا ترا
ہر زباں تسبیح پڑھتی ہے تری
ہر لبِ مخلوق پر کلمہ ترا
تیری قدرت کا ہے مظہر ہر نفس
" کون سی شے میں نہیں جلوہ ترا "
ذات تیری وحدہٗ تو لا شریک
کوئی بھی ثانی نہیں مولیٰ ترا
سب کے سب کم تر ہیں تیرے سامنے
سب سے برتر ہے خدا رتبہ ترا
تیری ہی تابع ہر اک مخلوق ہے
دہر کی ہر شے پہ ہے قبضہ ترا
عرش پر شکلِ مہ و مہر و نجوم
پُر ضیا ہے نور کا کنبہ ترا
تو نے بندوں کو سخاوت کی عطا
بانٹتے ہیں تاجور صدقہ ترا
کیوں جبیں خم ہو درِ اغیار پر
سر بلندی ہے مری سجدہ ترا
اے خدا دے دے اسے غم سے نجات
احسنِؔ محزوں بھی ہے بندہ ترا
شاعر کا نام :- احسن اعظمی
کتاب کا نام :- بہارِ عقیدت