یَا نَبِی سَلَامٌ عَلَیْکَ
یَارَسُوْل سَلَامٌ عَلَیْک
یَا حَبِیْب سَلَامٌ عَلَیْک
صَلٰوَاتُ اللہِ عَلَیْک
آمنہ بی بی کا جایا
بارہویں تاریخ آیا
صبحِ صادِق نے سنایا
صَلٰوَاتُ اللہِ عَلَیْک
اَلسَّلَام اے جانِ عالم
اَلسَّلَام ایمانِ عالم
شاہِ دِیں سلطانِ عالم
صَلٰوَاتُ اللہِ عَلَیْک
خاتم دورِ رِسالت
اَخترِ برجِ ہدایت
فاتحِ بابِ شفاعت
صَلٰوَاتُ اللہِ عَلَیْک
اَلسَّلَام اے شاہِ عالی
اَلسَّلَام اُمت کے والی
عرض کرتے ہیں سوالی
صَلٰوَاتُ اللہِ عَلَیْک
نوح کے تم ناخدا ہو
خلق کے مشکل کشا ہو
سب کے تم حاجت روا ہو
صَلٰوَاتُ اللہِ عَلَیْک
بخش دو میری خطائیں
دُور ہوں غم کی گھٹائیں
بھیج دو اپنی عطائیں
صَلٰوَاتُ اللہِ عَلَیْک
ہوں پھنسا اَفکارِ غم میں
گھر گیا رَنج و اَلم میں
دیر کیا ہے اب کرم میں
صَلٰوَاتُ اللہِ عَلَیْک
کفر کو تم نے مٹایا
خاک میں اس کو ملایا
دِین کا ڈَنکا بجایا
صَلٰوَاتُ اللہِ عَلَیْک
اب تو طیبہ میں بلالو
حسرتیں دِل کی نکالو
اپنے بد کو بھی نبھالو
صَلٰوَاتُ اللہِ عَلَیْک
دِل میں رَنگ اپنا جمادو
پردۂ غفلت اُٹھا دو
بختِ خوابیدہ جگا دو
صَلٰوَاتُ اللہِ عَلَیْک
جان نکلے اس طرح پر
آپ کا دَر ہو مرا سر
سامنے ہو قبرِ اَنور
صَلٰوَاتُ اللہِ عَلَیْک
جانکنی کے وقت آنا
کلمۂ طیب سکھانا
چہرۂ اَنور دکھانا
صَلٰوَاتُ اللہِ عَلَیْک
اے شفیعِ روزِ محشر
ہیں سیہ عصیاں سے دفتر
غوث کا صدقہ کرم کر
صَلٰوَاتُ اللہِ عَلَیْک
کچھ نہ کی ہم نے کمائی
عمر سب یوہیں گنوائی
اے عرب والے دُہائی
صَلٰوَاتُ اللہِ عَلَیْک
حشر میں تم بخشوانا
اپنے دامن میں چھپانا
ہر مصیبت سے بچانا
صَلٰوَاتُ اللہِ عَلَیْک
اے شہنشاہِ رِسالت
ہیں یہاں جو اہلسنّت
تا اَبد سب پر ہو رحمت
صَلٰوَاتُ اللہِ عَلَیْک
دِین کا ہو بول بالا
سنیوں کا رُخ اُجالا
دشمنوں کا منہ ہو کالا
صَلٰوَاتُ اللہِ عَلَیْک
بانیِ محفل کی آقا
اِلتجا مقبول فرما
پوری ہو ہر اِک تمنا
صَلٰوَاتُ اللہِ عَلَیْک
اس جمیلؔ قادری پر
ہو کرم محبوبِ داوَر
چشم و دِل کردو منوّر
صَلٰوَاتُ اللہِ عَلَیْک
شاعر کا نام :- جمیل الرحمن قادری
کتاب کا نام :- قبائلۂ بخشش