آپؐ سے رشتہ غلامی کا سدا قائم رہے

آپؐ سے رشتہ غلامی کا سدا قائم رہے

خواجگی اور بندگی کی یہ فضا قائم رہے

---

لفظ پھولوں کی طرح گرتے رہیں قرطاس پر

نعت کہنے کا چمکتا سلسلہ قائم رہے

---

آپؐ سے میں گفتگو کرتا رہوں تا زندگی

میرے دل میں ایک رستہ خواب سا قائم رہے

---

آپؐ سے میں جو خوشی مانگوں وہ مِل جائے مجھے

میرے حق میں آپؐ کا حرفِ دُعا قائم رہے

---

تا ابد آنے نہ پائے اُن کی عظمت پر زوال

شہرِ کعبہ اور شہرِ مصطفیٰؐ قائم رہے

---

آپؐ کے قدموں کی دل میں چاپ سی محسوس ہو

میرے دل سے آپؐ کا یہ رابطہ قائم رہے

---

سلسلہ ٹوٹے نہ یادوں کا مرے دِل سے کبھی

اِک دیا بجھنے لگے تو دوسرا قائم رہے