ذرّہ ذرّہ مسکرا کر آسماں بنتا گیا

ذرّہ ذرّہ مسکرا کر آسماں بنتا گیا

اِک جہاں مِٹتا گیا اور اِک جہاں بنتا گیا

---

آپؐ کے قدموں کو چھونے سے ہوئی روشن زمیں

قریہ قریہ نُور کی اِک کہکشاں بنتا گیا

---

میں نے جو بھی لفظ لکھا آپؐ کی تعریف میں

وہ مرے خاموش لہجے کی زباں بنتا گیا

---

آپؐ کے آنے سے آیا خوبصورت انقلاب

معصیت کا دور بھُولی داستاں بنتا گیا

---

جیسے جیسے دھوپ کی بے رحمیاں بڑھنے لگیں

آپؐ کا سایہ سروں پر سائباں بنتا گیا

---

کتنی ہی آنکھوں میں خوشیوں کی چمک پیدا ہوئی

آپؐ کے آتے ہی میلے کا سماں بنتا گیا

---

آپؐ آئے تھے تو دنیا میں اکیلے تھے مگر

دیکھتے ہی دیکھتے اِک کارواں بنتا گیا