اتنی بلندیوں سے ابھر کر نہیں ملا

اتنی بلندیوں سے ابھر کر نہیں ملا

اوروں کو آپؐ جیسا پیغمبر نہیں ملا

---

دیکھا تو ایک بار ستاروں کی آنکھ نے

بارِ دِگر کسی کو وہ منظر نہیں ملا

---

چہرے بہت ملے ہیں زمیں پر نئے نئے

لیکن حضور جیسا منوّر نہیں ملا

---

تھک ہار کے وہ بیٹھ گئے پر سمیٹ کے

دونوں جہاں کو آپؐ کا ہم سر نہیں ملا

---

جتنے بھی آئے کم تھے رسالت مآبؐ سے

ایسا کہیں کسی کو پیمبر نہیں ملا

---

دنیا کی پھر بجھی نہ کسی سے کبھی پیاس

تشنہ لبوں کو پھر وہ سمندر نہیں ملا

---

دنیا نے پھر نہ دیکھا وہ مہکا ہوا وجود

دنیا کو پھر وہ حُسنِ معنبر نہیں ملا

---

اتنے ہوں جاں نثار ، کسی کے زمین پر

دونوں جہاں ہوں جس پہ نچھاور ، نہیں ملا

---

اک بارآ کے رُوٹھ گیا تھا جہان سے

پھر اِس زمیں پہ کوئی ابوذر نہیں ملا

---

صدیق سا کسی کا نہیں ہے کوئی رفیق

حسان سا کسی کو سخن وَر نہیں ملا

---

تکتے ہیں کس اُداس نگاہی سے وہ ہمیں

دامن ملے ہیں جن کو رفوگر نہیں ملا

---

اک سے ہے ایک بڑھ کے صحابی حضورؐ کا

انجؔم کوئی بھی اُن کے برابر نہیں ملا