اپنی مرضی سے کہاں نعتِ نبی کہتے ہیں

اپنی مرضی سے کہاں نعتِ نبی کہتے ہیں

اس کو فیضانِ رسولِ عربی کہتے ہیں

---

عشق میں ڈوب کے جو نعتِ نبی کہتے ہیں

ایک اِک حرف کو ہم حرفِ جلی کہتے ہیں

---

تو سمجھتا ہے جسے عرش کی جنت رضواں

ہم اسے شہرِ مدینہ کی گلی کہتے ہیں

---

زہدوتقویٰ پہ کسی کے نہیں جاتے ہم تو

عشقِ آقا بھی اگر ہو تو ولی کہتے ہیں

---

پیکرِ نور ہے جو رحم و کرم سرتاپا

ہاں اُنہی کو تو رسولِ عربی کہتے ہیں

---

اپنے محبوب سے اک بار ملا دے یارب

ہم تو ہر بار دعائوں میں یہی کہتے ہیں

---

جس کو حاصل مرے آقا کی ولادت کا شرف

ہاں شفیقؔ اُس کو ہی مسعود گھڑی کہتے ہیں