میرا مولا، میرا خدا تُو ہے

میرا مولا، میرا خدا تُو ہے

ہر بلندی کی انتہا تُو ہے

---

تو ہی فتاح اور ہادی تُو

بند رستوں کو کھولتا تُو ہے

---

کبر تیرے لیے ہے ربِّ جلیل

لاشریک اور کبریا تُو ہے

---

اپنے بندوں کا ایک ایک عمل

میرے معبود دیکھتا تُو ہے

---

جب بھی اخلاص سے کیا سجدہ

میرے مالک مجھے ملا تُو ہے

---

میری اپنی نوا نہیں کوئی

درحقیقت مری نَوا تُو ہے

---

کوئی حامی نہیں ہے جن کا یہاں

ان کا حامی بھی آسرا تُو ہے

---

یہ ہے حق الیقین طاہرؔ کا

سب کے ہر درد کی دوا تُو ہے