سب کچھ ترے اشارے پر ہو سکتا ہے

سب کچھ ترے اشارے پر ہو سکتا ہے

طوفاں زدہ کنارے پر ہو سکتا ہے

---

چاند اتر سکتا ہے کٹیاؤں میں بھی

مٹی کا حق تارے پر ہو سکتا ہے

---

چمنستاں بن سکتی ہے جنگل کی آگ

کھلتا پھول، شرارے پر ہو سکتا ہے

---

گر سکتے ہیں ٹوٹ کے دھرتی پر افلاک

ذرۂ خاک، منارے پر ہو سکتا ہے

---

جن و ملائیک بھی ہیں یہاں تو انساں بھی

اور کسی سیّارے پر ہو سکتا ہے

---

تیرا رحم امیروں ہی کے لیے نہیں

بیکس پر بیچارے پر ہو سکتا ہے

---

بربادی میں ہو سکتی ہیں بہتریاں

نفع و سود خسارے پر ہو سکتا ہے