بُراقِ فکر ہے گردوں نو رد آج کی رات

بُراقِ فکر ہے گردوں نو رد آج کی رات

ہَوا اُڑاتی ہے تاروں کی گرد آج کی رات

---

یہ کون ذہن کے روشن مکان میں اُترا

خیال صُورتِ جبریل دھیان میں اُترا

---

ہے خم ، رسائی اِنساں پہ فاصلوں کی جبیں

بلندیوں پہ کمندیں اُچھالتی ہے زمیں

---

یہ رات کیوں نہ ہو افضل تمام راتوں میں

لِیے ہُوئے ہیں اندھیرے ٗ چراغ ہاتھوں میں

---

وہ رات ، جس کا زمانہ جواب لا نہ سکے

مِلائے آنکھ تو سُورج بھی تاب لا نہ سکے

---

وہ رات جس نے حسیں خواب جاگ کر دیکھا

وہ رات جس نے محمّد ؐ کو عرش پر دیکھا

---

گیا تھا عِشق ، خلاؤں کی راہ سے آگے

نِگاہ جاتی ہے حدِّ نگاہ سے آگے

---

رُکی رُکی نظر آتی تھی نبض عَالَم کی

گُزر رہی تھی سواری رسُولِ اکرمؐ کی

---

رواں تھے ساتھ فرشتے عبا اُٹھائے ہُوئے

فضائیں ، کتبہء صَلِّ عَلیٰ اُٹھائے ہُوئے

---

عروجِ آدمیّت آپ پر تمام ہُوا

خُدا خُود اپنے ہی جلوؤں سے ہمکلام ہُوا

---

تجلیّات کے ہالے میں یُوں گھِرے دونوں

کمان ِ وصل کھِنچی ، مِل گئے سِرے دونوں

---

بلند ایسے نہ رُتبے کسی نبی کے ہُوئے

زہے نصیب کہ ہم اُمّتی اُسی کے ہُوئے