دلِ تپیدہ ہے صحرا تو چشمِ تر دریا

دلِ تپیدہ ہے صحرا تو چشمِ تر دریا

ہے ہجرِ طیبہ میں صحرا کا ہم سفر دریا

---

یہ آج دل کے سبھی بند کیسے ٹُوٹ گئے

کبھی تو آنکھ میں آتا تھا بُوند بھر دریا

---

مِرے وجود کا ایک ایک ذرّہ پیاسا ہے

مِری زمیں سے نہ گُزرے گا بے خبر دریا

---

سفینے کو غمِ طوفاں نہ خطرۂ گرداب

تری نگاہ نے رکّھا ہے بانّدھ کر دریا

---

گھٹا جو جھُوم کے اُٹھّی تھی کوہِ فاراں سے

بہے ہیں فیض سے اُس کے نگر نگر دریا

---

نوید ہو تری اُمّت کی خاکِ مُردہ کو

وُہ آگیا تری رحمت کا جوش پر دریا

---

ہماری زیست تہی تیرا ہاتھ ابرِ کرم

ہماری کشت بیاباں تری نظر دریا

---

مُجھے مدینے کے آثار جب نظر آئے

تو میری آنکھ سے ٹپکا گہر گہر دریا

---

رواں ہیں سب مری موجیں اُسی کے ساحل تک

بنا ہے جِس کے کرم سے مرا ہُنر دریا

---

یہ ذوقِ نعت بھی عاصی اُسی کی رحمت ہے

ہے میری خاک کے کینوس پہ نقش گر دریا