شانِ خدا بھی آپ ‘ محبوبِ خدا بھی آپ ہیں

شانِ خدا بھی آپ ‘ محبوبِ خدا بھی آپ ہیں

تجسیم حق بھی آپ ہیں اور حق نُما بھی آپ ہیں

---

روزِ ابد تک آپ ہیں سالارِ جیشِ انبیاء

روزِ ازل سے مرشدِ اہلِ صِفا بھی آپ ہیں

---

قدرت کی ہر تخلیق کا ہیں آپ واحد مُدّعا

حسنِ زمیں بھی آپ ہیں نورِ سما بھی آپ ہیں

---

اپنے رفیقوں کے لیے پتھر بھی ڈھوئے آپ نے

اور دشمنوں کے حق میں مصروفِ دُعا بھی آپ ہیں

---

اِسلام کے حلقے میں جو اوہام کا بیمار ہو

اس کی دوا بھی آپ ہیں اس کی شِفا بھی آپ ہیں

---

ہر دائرہ آواز کا ‘ لفظِ محمدؐ بن گیا

میرے لیے تو قبلہء صوت و صدا بھی آپ ہیں

---

میں فلسفوں کی دھوپ میں جلتا رہا ہوں عمر بھر

اِن علم کے صحراؤں میں موجِ صبا بھی آپ ہیں

---

ظلماتِ این و آں میں ہوں ‘ میں کب سے سرگرمِ سفر

اور اس سفر میں ‘ میری منزل کا پتہ بھی آپ ہیں

---

اس محفلِ عُشّاق کا ہر فرد ثروت مند ہے

ہر شخص کے اپنے ہیں ‘ اور پھر بے بہا بھی آپ ہیں

---

میرا ‘ ندیمؔ‘ ایماں ہے یہ ‘ ایماں کی اک میزاں ہے یہ

بے اِنتہا بھی آپ ‘ لیکن ‘ اِنتہا بھی آپ ہیں